Ourense, Capital do Entroido de Galicia

Prepárate para vivir o Entroido de Ourense; só é preciso traer moitas ganas de pasalo ben.

Capital do Entroido

O Entroido é quizais a festa máis alegre, colorista e aloucada de todas as que se celebran na nosa cidade (e non son poucas!). Son días e noites de música, disfraces, risas e longas comidas entre amigos. Unha celebración ao grande cuxas raíces se perden no tempo e que en Ourense se vive con paixón: por algo somos a Capital do Entroido de Galicia.

Unha cidade, catro entroidos

Dentro da cidade existen catro entroidos diferenciados, cada un coa súa propia personalidade. O máis multitudinario ten lugar no centro da cidade, e en especial na zona dos Viños e a Praza Maior, onde converxe todo o ambiente nocturno. O punto de saída márcano o xoves de compadres (10 días antes do luns de entroido) e unha semana máis tarde, o xoves de comadres. Nestes días, primeiro os homes e á semana seguinte as mulleres búrlanse uns doutros e crean “mecos” (bonecos do sexo oposto) que os “inimigos” do outro sexo tratarán de destruír. O máis destacado son as batallas que nenos e nenas realizan na Praza Maior polas mañás, e en especial o ambiente nocturno do xoves de comadres, no que grupos de mulleres (e homes obrigatoriamente disfrazados de muller) entréganse ao baile e á esmorga.
 alt=
A partir de aquí empeza o verdadeiro Entroido, cinco días de festa ininterrompida nos que as rúas se enchen de música e cor grazas a charangas, comparsas e desfiles. Disfraces máis elaborados e elegantes comparten protagonismo con outros máis simples, pero en todos eles destacan o bo humor e as ganas de pasalo ben.

Quizais os puntos álxidos sexan as noites do sábado e luns de entroido (o martes é festivo local), e por suposto o colorido desfile de comparsas que ten lugar o domingo. As celebracións acaban o mércores de cinza co tradicional enterro da sardiña, cando a cidade se viste de loito para despedir unha das súas festas máis queridas até o ano seguinte.

Xunto co entroido máis urbano, algúns barrios e núcleos do municipio de Ourense contan con tradicións e personaxes propios que contribúen a dar cor e orixinalidade ao Entroido ourensán. Na Ponte, barrio da beira norte do Miño, a festa está moi marcada polas enchentas dos confrades do irreverente Frei Canedo. Seixalbo e As Eiroás contan tamén con personaxes propios: na pintoresca poboación de Seixalbo, os mecos Paquita e Nicanor saen en procesión antes da súa queima; e a máscara da Pita desfila en Eiroás, adornada con cintas de cores. Nestes núcleos as celebracións adiántanse ao «domingo oleiro», cando se celebra o tradicional xogo das olas de arxila.

Entroidos da provincia

A cidade é a lanzadeira perfecta para descubrir os diferentes entroidos da provincia. Especialmente significativos son os de Laza, Verín, Xinzo de Limia, Maceda, Viana do Bolo e Manzaneda, todos eles declarados Festas de Interese Turístico e nos que destaca o colorido das súas máscaras únicas: cigarróns de Verín, peliqueiros de Laza, pantallas de Xinzo… Son varias as compañías de transporte e axencias de viaxes que ofrecen servizos de traslado desde a cidade até estes destinos, mesmo até alta horas da noite, para poder esquecerse do coche durante a festa.

pulpo1
pulpo2

A provincia de Ourense acolle numerosos entroidos ancestrais, con figuras emblemáticas como as pantallas de Xinzo, os peliqueiros de Laza ou os cigarróns de Verín.

Sabores de Entroido

A gastronomía cobra un gran protagonismo no Entroido ourensán. É época de gozar un bo cocido galego, composto de verdura, garavanzos, patacas, mesmo castañas e por suposto carne, en especial de porco, entre as que poden aparecer embutidos tradicionais como as androllas e o botelo. O toque doce póñeno filloas, bicas e especialmente as orellas, a sobremesa máis entroideira, elaborada con ovos, fariña e azucre. Todo iso regado con viños das denominacións de orixe ourensás de Ribeiro, Ribeira Sacra, Monterrei ou Valdeorras, e os licores locais, entre os que destacan o licor café e o de herbas.

Programa de actividades Entroido 2024

Podes consultar o Programa do Entroido na cidade de Ourense neste enlace.

Tamén podes descargar o programa de todos os entroidos da provincia de Ourense neste enlace. (pdf 7Mb)

Cada ano os entroidos contan cunha programación de actividades propias que poderás consultar na nosa axenda.

Compartir

Calendario de festas
Calendario de festas

Ler máis

Axenda

Axenda de eventos para que goces do ocio e a cultura en Ourense.

Axenda de eventos para que goces do ocio e a cultura en Ourense.

Ler máis