Os días 7, 17 e 26 de cada mes (días de feira nas beiras do Miño) é recomendable achegarse ao mercado que se forma nos arredores da Praza de Abastos, xunto á Alameda. Os seus máis de 250 postos esténdense polas beiras do río Barbaña ofrecendo mercadorías de todo tipo: téxtil, artesanía, cerámica, alimentación… Os máis avezados seguro que atoparán grandes gangas.
Se calquera dos días de feira (7,17 e 26) caese en domingo, trasladaríase ao luns seguinte.
O primeiro domingo de cada mes, a Praza Maior acolle ademais o mercado de antigüidades: mobles, cerámica, filatelia, numismática… Un rastro con cheiro a vello que encantará aos nostálxicos.
Feiras temáticas
Periodicamente, Ourense acolle mercados especializados coincidindo con datas sinaladas: impresionante é o mercado medieval das Festas Maiores, que transforma por completo as rúas do Centro Histórico. A zona da Avenida de Pontevedra, xunto aos Xardíns da Alameda, ou a rúa do Paseo son os emprazamentos típicos doutras citas temáticas como a Feira de Artesanía, a Feira do Libro (ambas na primavera) ou o Mercado de Nadal.