Muíño da Veiga

ACTUALIDADE: Instalacións temporalmente pechadas a causa da crecida do río Miño. Podes consultar o estado actual de todas as termas da cidade nesta ligazón.

Situado practicamente no leito do río Miño, trátase dun espazo de baño ao aire libre ao pé dun antigo muíño en madeira (unha acea) totalmente restaurado, do cal toma o nome. Forma parte do Paseo Termal da cidade de Ourense, e está rodeado dunha ampla zona verde recreativa, que se funde coa vexetación de ribeira do lugar.

O conxunto fórmano cinco piscinas: un vaso principal de 200 m2, un segundo de 130 m2 e outros dous máis pequenos de 55 e 45 m2, ademais dun vaso de auga fría para baños de contraste.

A zona de baño dispón de vestiarios con consignas e aseos a disposición dos usuarios. O acceso é gratuito aínda que existe un límite de capacidade, e para utilizar estas termas é preciso bañador, chancletas e toalla. No caso de querer utilizar as consignas hai que levar un cadeado.

A auga de baño rolda aquí os 40º C. Todo o recinto está alimentado por varias surxencias manando a temperaturas de entre 65 e 72º C, algunhas das máis quentes da Península. As augas deste espazo de baño son de mineralización débil e alcalinas: bicarbonatadas-sódicas, fluoradas e silicatadas.

Como chegar

O espazo de baño de Muíño da Veiga é de acceso peonil. Sitúase na marxe dereita do río Miño, a uns 5 km da Praza Maior, a uns 500 metros das Termas de Outariz  e a uns 3 kilómetros da Chavasqueira.

O aparcadoiro máis próximo, non apto para autobuses, atópase a uns 300 metros da zona de baño e ten acceso desde a N-120. Ver en mapa

Tamén é posible aparcar na beira oposta, na zona de Reza/Outariz, a uns 1.300 metros. Ver en mapa

Ambos estacionamentos son gratuitos.

En canto ao transporte público, a alternativa máis cómoda é o Tren das Termas, con saída desde a Praza Maior e parada nesta zona de baño. Poden consultarse todas as opcións de transporte público ao Paseo Termal neste enlace.