Semana Santa 2023
Ideas para sacar o máximo partido á vosa estadía na cidade de Ourense durante Semana Santa
Oficina Municipal de Turismo
Dirección: rúa Isabel A Católica, 2 (xardíns Padre Feijóo). Tel. 988 366 064. Localización.
Sempre é unha boa idea achegarse á Oficina Municipal de Turismo, onde vos orientarán sobre que facer na cidade e vos facilitarán planos e folletos informativos.
Visitas guiadas: a cidade sen segredos
Percorrer Ourense da man de guías especializados ofrece a posibilidade de coñecer dunha maneira entretida os monumentos e os lugares con encanto, descubrindo a historia, pero tamén as curiosidades e anécdotas que garda esta cidade.
Descubrir a Catedral de San Martiño
A Catedral é o principal monumento da cidade e unha das visitas que non se debe perder. A entrada permite descubrir a beleza do Pórtico do Paraíso, o rico Barroco da Capela do Santo Cristo, o Altar Maior e as curiosas pezas que garda a colección de Tesouros da Catedral. Podedes complementar a visita cun paseo panorámico polos seus tellados ou incluso adentrarvos na emblemática igrexa de Santa María Nai.
Plans con nenos I: Explorando Ourense con Martiño
Se viaxades cos máis cativos, achegádevos á Oficina Municipal de Turismo, onde vos proporcionarán uns divertidos mapas da zona histórica e do Paseo Termal do río Miño, para que coñezades a cidade da man das nosas mascotas Martiño e Calpurnia.
Plans con nenos II: O mundo do Tren
O Parque Ferroviario Carrileiros amplía os días de apertura para que poidades montarvos sobre os seus simpáticos trens. Completade a experiencia en torno ao mundo do ferrocarril, visitando a colección de trens en miniatura Fernández Pacheco e tomando o Tren das Termas na Praza Maior. Gozaredes dun agradable paseo ata o espazo termal de Outariz e Burga de Canedo, onde poderedes tomar un baño nas súas relaxantes augas (lembrade que a idade mínima de acceso ás termas é de 5 anos nas Termas de Outariz e 10 anos en Burga de Canedo).
Gozar dunha experiencia termal
Pasear pola beira do río Miño permite gozar de quilómetros de natureza mentres se descubren os circuítos termais do Paseo Termal. Aquí poderedes tomar un relaxante baño tanto nas Termas de Outariz (de pago) como nas termas gratuitas de Burga de Canedo.
E tampouco vos perdades as históricas fontes das Burgas, situadas en plena zona monumental, son un dos emblemas da cidade de Ourense.
Programación relixiosa
O Domingo de Ramos unha multitudinaria bendición no Parque de San Lázaro dá inicio á programación relixiosa da Semana Santa, aínda que é a partir do Xoves Santo cando se suceden as principais procesións. Unha das máis singulares é a coñecida como Cerimonia do Desplante, que ten lugar o Domingo de Resurrección. Trátase dun xesto simbólico que evoca o convulso pasado de enfrentamentos entre o poder civil e o eclesiástico que tanto marcou a historia da cidade.
Axenda cultural
E se non vos queredes perder nada, tamén podedes consultar as actividades culturais da cidade na nosa axenda (visita.ourense.gal) e os horarios dos monumentos e lugares de interese nesta ligazón.
Moi preto de Ourense
A cidade de Ourense é unha excelente base de operacións para descubrir os seus fermosos arredores. A zona da Ribeira Sacra, as vilas de Allariz, Ribadavia ou Celanova, así como o mosterio de Oseira son algunhas das visitas obrigadas nas inmediacións da cidade. Neste mapa poderedes atopar propostas para todos os gustos. Se non dispoñedes de vehículo propio ou preferides as excursións organizadas, sempre podedes optar por tours con saída desde a cidade.