Centro Cultural José Ángel Valente

Horario especial Nadal:
– 24 e 31 de decembro: 11:30 a 13:30h
– 25 de decembro, 1 e 6 de xaneiro: pechado

Leva o nome dun dos poetas máis universais de Ourense. No seu tempo foi o edificio que se levantou para sede do Banco de España, inaugurado en 1930. En 2010 remodelouse mantendo a decoración orixinal, pero adaptando a planta baixa para dedicala á actividade cultural da cidade, sobre todo exposicións. A sala municipal ocupa só a planta baixa, mentres que as superiores son oficinas do Catastro, con entrada independente pola rúa Concordia.

O edificio, de 1929, foi realizado polos arquitectos Juan de Zavala Lafora e José Yarnoz Larrosa. O primeiro foi colaborador de Le Corbusier e a segundo Medalla de Ouro de Belas Artes e membro da Academia de San Fernando. O proxecto de rehabilitación supuxo o seu baleirado completo, respectando a tipoloxía do orixinal e os elementos de interese patrimonial. Así, consérvase intacta a fachada exterior, con saída á rúa do Paseo, as carpintarías da planta baixa e a configuración espacial da planta nobre.

Espectacular é a elegante vidreira que achega luz ao espazo, unha magnífica restauración da orixinal que pecha o patio central do edificio.

Podes consultar a programación actual deste e doutros centros expositivos da cidade de Ourense na nosa Axenda do mes.