Paseo termal do Miño: termas e natureza

O Paseo termal do Miño fórmano catro quilómetros de senda verde e peonil que concentran até sete espazos termais, moitos deles acondicionados para o baño. Aquí poderedes descansar e relaxarvos mentres gozades dun baño en plena natureza, sexa inverno ou verán. Trátase, sen dúbida, dunha desas cousas que non podedes perder na vosa visita a Ourense.

Este gran parque termal esténdese ao longo das ribeiras do río Miño ao seu paso por Ourense. No seu conxunto, as marxes fluviais son a gran arteria verde da cidade: varios quilómetros de exuberante vexetación polos que pasear, correr ou ir en bicicleta mentres admiramos a natureza e a paisaxe. Na nosa sección de paseos expómosvos unha ruta de menos de 13 km perfecta para descubrir a zona.

No que respecta ao Paseo termal, este discorre pola beira dereita do río e arrinca a poucos metros da Ponte do Milenio. Na zona da Chavasqueira atopamos o primeiro dos espazos termais e o máis próximo ao centro urbano. Aquí, se o nivel do río o permite, pódese gozar dun relaxante baño ao aire libre nas termas de acceso gratuíto. Tamén se trata dunha zona perfecta para deitarse a tomar o sol.

O Paseo termal do Miño continúa até a fonte do Tinteiro, un manancial moi querido e prezado pola veciñanza polas súas propiedades para o coidado da pel. A fonte atópase sobre unha plataforma miradoiro sobre o río e é un bo lugar desde o que observar as aves que fixeron do Miño o seu fogar.

Unha camiñada de algo máis de 2 quilómetros levaranos até Muíño da Veiga, coas súas catro piscinas e as súas magníficas postas de sol. O lugar tamén é accesible en coche xa que conta cun aparcadoiro nas inmediacións). Un pouco máis adiante, as Termas de Outariz ofrecen tratamentos de beleza, saunas e dous circuítos termais a prezos moi competitivos. Xusto antes da pasarela que cruza cara á outra beira, atopamos as piscinas de Outariz e Burga de Canedo, o maior centro de actividade termal en Ourense, de uso gratuíto. Na beira oposta, en Reza, continua a ruta polo Paseo das Ninfas, onde atoparemos a nosa última parada, a fonte de Reza.