Termas de Outariz

Termas de Outariz é unha instalación inspirada na cultura balnearia de Xapón, o Onsen, que se basea nos principios de respecto e harmonía coa natureza. Lugar de paz e tranquilidade, trátase dun espazo onde gozar dunhas horas de relax e evasión ao alcance de calquera. O recinto termal, con capacidade para 180 persoas, dispón de 11 termas exteriores e 3 interiores organizadas en 2 circuítos:

• Circuíto Zen: coas súas augas calmas e as construcións en madeira e pedras ovaladas, está deseñado para a relaxación e a meditación.
• Circuíto Celta, inspirado na arquitectura dos castros, con termas construídas en pedra. As augas teñen máis movemento, chorros, burbullas e fervenzas. Especialmente indicado para eliminar tensións e contracturas musculares.

Os circuítos contan con rotenburos e ofuros (termas tradicionais xaponesas), chorros de gravidade, jacuzzi, toneis de auga fría para baños de contraste, covas, saunas e un gran spa con efectos de correntes, géyser, catarata e camas de auga. Todo disposto nunha contorna única con vistas ao Miño, rodeada de vexetación.

A experiencia termal pódese completar cunha masaxe ou con algún dos tratamentos de beleza dispoñibles: baños aromáticos, chocolaterapia, viñoterapia, envolturas (barro, algas, té…), tratamento hidratante, peeling, etc.

A estación termal de Outariz dispón tamén de servizo de bar, disposto na zona superior das instalacións, cunha ampla terraza exterior onde gozar dun refrixerio e hidratarse despois do baño. Ademais de refrescos e bocadillos, a carta conta tamén con especialidades xaponesas, incluíndo o sushi.

Para a organización de eventos e reunións, conta cunha sala multiusos de gran capacidade e unha zona de baño reservada.

Atópase nunha zona peonil que forma parte do Paseo Termal da cidade de Ourense. Existen dúas zonas de estacionamento próximas, así como diferentes opcións de transporte público, aínda que o único vehículo que accede ata estas instalacións é o Tren das Termas. Consulta máis información de cómo chegar nesta ligazón.