Deportes

Carreiras e running

Sendo unha cidade máis ben chaira, Ourense préstase ao running: os 12 quilómetros de senda verde nas beiras do Miño (popularmente coñecidos como a «Ruta do Colesterol») son un lugar ideal para practicalo, aínda que tamén para percorrelos en bicicleta ou simplemente dando un paseo. Aquí adestran os futuros participantes da Carreira de San Martiño, un dos principais acontecementos deportivos da cidade, con case catro décadas de historia. Trátase unha carreira urbana de case 10 quilómetros homologable para diferentes probas e na que cada ano participan máis de 10.000 corredores.

O resto do ano celébrase Correndo por Ourense, un circuíto de carreiras populares polos diferentes barrios da cidade. Os máis ousados tamén poden atreverse coas carreiras de obstáculos: seguro que o Miño Radikal estará á altura de as expectativas.

No recinto feiral de Expourense,en Finca Sevilla, atópase a  única pista de atletismo indoor hidráulica e homologada de Galicia, unha das tres mellores de España. Estas instalacións contan coa tecnoloxía máis avanzada e están acollendo entrenamentos e competición de atletas galegos, españois e estranxeiros.

Tampouco perdades…

O Rallye de Ourense

A paixón polo automobilismo en Ourense ten nome propio, o do piloto e empresario Estanislao Reverter. En 1967 organizou o primeiro rallye da cidade, a imaxe das probas nas que el competía por toda Europa. Foi todo un éxito e enseguida situouse como unha das probas máis importantes de España: hoxe, case medio século despois, goza de excelente saúde, atraendo cada verán a miles de afeccionados do motor de todo o país. É proba puntuable no Campionato de España de Rallye de Asfalto.

A figura de Reverter está unida á Escuadra Ourense, que el fundou. Sempre ao temón do rallye, creou escola na cidade, formando pilotos locais que souberon facerse un oco no automobilismo español.

Unha estatua no centro da cidade, ao final da rúa do Paseo, homenaxea a Estanislao Reverter e o seu coche Alpinche, un Renault Alpine con mecánica Porsche que chegou a converterse nunha lenda do automobilismo en Galicia.

Tenis e pádel

O Club Santo Domingo leva desde finais dos anos 70 recibindo aos afeccionados ás raquetas nas súas 6 pistas de tenis exteriores. Xunto coas 4 dispoñibles no Complexo Deportivo Monterrei suman unha oferta de 10 pistas na cidade. A moda do pádel chegou tamén a Ourense, con varias instalacións para practicalo, como en Oira ou nos polígonos de San Cibrao ou As Coiñás.

Golf

A cidade conta co seu propio campo a 5 quilómetros do centro urbano, no Montealegre Club de Golf, un percorrido de 18 buracos. A súa variante máis popular, o Pitch & Putt, ten un campo de 18 buracos na zona do Fonsillón (http://pitchandputtourense.com).

Piscinas

As piscinas ao aire libre son unha auténtica bendición cando apertan as calores do verán ourensán, especialmente para os pequenos da casa, que as aproveitan como ninguén. A beira do río Miño, na zona de Oira, atopansen as únicas piscinas municipais de acceso gratuito, aínda que tamén son moi populares as do Complexo Polideportivo de Monterrei, e a piscina exterior do Pavillón Polideportivo dos Remedios.

Durante todo o ano tamén están dispoñibles as instalacións de BeOne As Lagoas, no Campus Universitario, o Pavillón Polideportivo dos Remedios, ou o Centro Deportivo das Eiroás, que contan con piscinas interiores.

Instalacións deportivas