Paseo termal do Miño
A arteria verde da cidade concentra numerosos espazos termais en plena natureza onde descansar e desconectar da rutina.
As ribeiras do río Miño constitúen a grande arteria verde da cidade, varios quilómetros de exuberante vexetación polos que pasear, correr ou ir en bicicleta mentres admiramos a natureza e a paisaxe. No seu tramo máis occidental, despois da Ponte do Milenio, atopamos numerosos mananciais de auga termal, moitos deles acondicionados para o baño… Unha desas cousas que non podes perder se nos visitas.
O Paseo Termal do Miño fórmano catro quilómetros de senda peonil onde se concentran ata sete instalacións termais nas que descansar e relaxarnos mentres gozamos dun baño en plena natureza, sexa inverno ou verán.
A ruta comeza na marxe dereita do río, na zona termal da Chavasqueira, a máis próxima á cidade, onde gozar dun baño baixo as estrelas nas termas exteriores de acceso gratuíto.
O camiño continúa ata O Tinteiro, unha fonte-mirador moi frecuentada polos veciños da cidade e, desde aquí, á zona termal de Muíño da Veiga coas súas catro piscinas. Un pouco máis adiante, as instalacións de Termas de Outariz ofrecen tratamentos de beleza, sauna e dous circuítos termais a prezos moi competitivos.
Xusto antes da pasarela que cruza á marxe oposta atoparemos a zona termal de Outariz e Burga de Canedo, o maior centro de actividade termal en Ourense, ademáis de uso gratuíto. Na outra ribeira, en Reza, continúa o roteiro polo Paseo das Ninfas, onde veremos o último espazo termal desta zona, a fonte de Reza.
A Chavasqueira
Termas A Chavasqueira
Fonte do Tinteiro
Muíño da Veiga
Termas de Outariz
Outariz e Burga de Canedo
Fonte de Reza
Conxunto de piscinas naturais ao aire libre no comezo do Paseo Termal do Miño. Trátase da zona de baño máis próxima ao centro urbano.
Por causa do grave incendio producido o 24 de abril de 2019 estas instalacións están temporalmente fóra de servizo
Unha das fontes termais máis queridas na cidade.
Espazo de baño ao pé dun antigo muíño nas beiras do río Miño.
Un lugar de paz e relaxación a través das augas termais.
O espazo termal máis grande de Ourense, con termas ao aire libre listas para o baño.
Este manancial no Paseo das Ninfas está alimentado por unha veta termal que cruza o Miño desde a ribeira oposta, cunhas augas moi similares ás da fonte do Tinteiro.