Camiño de Santiago

O Camiño Mozárabe – Vía de la Plata

A Vía da Prata ou Camiño Mozárabe conecta Santiago de Compostela co sur de Península Ibérica, comezando tradicionalmente en Sevilla. É o itinerario xacobeo máis extenso en Galicia (uns 200 km de percorrido) e reúne unha ampla variedade de paisaxes e patrimonio histórico que o dotan de excepcional beleza.

A súa orixe remóntase a unha antiga calzada romana que unía Mérida con Astorga. A vía mantívose viva durante a Idade Media, primeiro cos visigodos e logo baixo a dominación islámica (de feito, o nome “Vía da Prata” provén de árabe «bal’latta»). Posteriormente os cristiáns mozárabes utilizaríana para peregrinar a Santiago desde Andalucía e Estremadura.

Desde La Granja da Moreruela (Zamora) este camiño entra en Galicia pola Gudiña. Aquí pódese escoller entre dous itinerarios, un por Laza e outro por Verín, que logo se unen en Ourense, primeira e única cidade galega antes de Santiago.

Desde aquí cúmprense os 100 quilómetros até Santiago, o percorrido mínimo para conseguir a Compostela a pé. Por que non escoller Ourense como principio de ruta para facer o camiño?

A credencial do peregrino

A credencial do peregrino é o pasaporte no que se cuñan os distintos selos das etapas a Santiago. É necesaria para durmir nos albergues e para obter a Compostela, o documento do cabido que certifica a realización da
peregrinación por motivos relixiosos ou espirituais. Para conseguila hai que acreditar polo menos 100 quilómetros a pé ou dacabalo ou 200 en bicicleta.

En Ourense, a credencial pódese adquirir tanto na catedral (988 220 992) como na Asociación de Amigos do
Camiño (988 391 110). Recoméndase confirmar os horarios de venda.

Sinalización

A frecha amarela é o sinal máis común que atopamos no Camiño de Santiago e indica sempre a dirección que seguir. Outro símbolo común é a cuncha de vieira, o outro emblema xacobeo. Símbolo da vida evocación da auga, a cuncha representa a converxencia dos múltiples camiños de Europa en Santiago. Identifica só o percorrido do Camiño, non a dirección.

Na provincia atopamos tamén as singulares «pedras» do escultor Nicanor Carballo, cada unha diferente e única: retámosvos a descubrilas!

O Camiño en Ourense

Ourense recibe ao peregrino no núcleo rural de Seixalbo, un Conxunto de Valor Etnográfico que aínda conserva
a súa traza medieval. Desde aí, o Camiño entra na cidade desde o sur, pola avenida de Zamora e a rúa Progreso até As Burgas, visita obrigada do peregrino desde a Idade Media.

Unha suave subida leva ao novo albergue de peregrinos na rúa da Barreira, a só uns pasos da Praza Maior. Desde aí xa se avista a Catedral de San Martiño, templo románico de transición onde ademais de visitar a capela do Santo Cristo, merece unha parada o policromado Pórtico do Paraíso. Nas rúas contiguas, a zona dos Viños, ideal para descubrir o mellor da gastronomía local en forma de tapas e petiscos.

O Camiño continúa pola Ponte Vella, a máis antiga da cidade. Tras cruzala, hai varias alternativas.

• O desvío leste conduce pola Avenida de Santiago até o antigo Camiño Real, que leva até a aldea de Cudeiro.
• O desvío oeste, en troques, segue o trazado da estrada N-120 até a costa de Canedo.
• Tamén é posible, unha vez cruzada a Ponte Romana, tomar a ruta termal do río Miño e gozar dun reconfortante baño. Esta variante conecta en Quintela co desvío oeste.