Rutas do Camiño de Santiago en Ourense

Camiño de Santiago – Entrada en Ourense

Ao entraren en Galicia pola Gudiña, os peregrinos da Vía da Prata poden elixir se continuaren por Verín ou por Laza. Ambos os itinerarios únense nas Pereiras (Taboadela) e seguen pola estrada OU-0102 cara a Ourense. Aqueles que escollan a variante de Laza atravesarán os núcleos de Xunqueira de Ambía, A Pousa e Ourense. O itinerario por Verín e Sandiás, á súa vez, atravesa Allariz, Santa Mariña de Augas Santas e Armeá, co seu castro (asentamento prerromano).

Os peregrinos chegan ao termo municipal de Ourense pola zona do Cumial e Seixalbo, un núcleo rural que os recibe antes de entraren na cidade pola Avenida de Zamora.

Camiño de Santiago – Variantes na saída de Ourense

Desde o Centro Histórico, o Camiño en Ourense continúa pola rúa do Paseo até chegar á Ponte Romana, que deberemos cruzar para salvar o río Miño. Na outra beira, xa no barrio da Ponte, o Camiño bifúrcase en dúas variantes.

• O desvío este continúa pola Avenida de Santiago cara ao antigo Camiño Real, que leva á aldea de Cudeiro.
• O desvío oeste segue o trazado da estrada N-120 cara á costa de Canedo e Palmés.

Ambos os trazados únense no sitio de Casas Novas, un pouco antes de Cea.

Existe tamén a posibilidade de, unha vez pasada a ponte, tomar a senda a beiras do Miño ao oeste e percorrer o Paseo Termal, onde ademais de gozar dunha agradable contorna natural, é posible probar as augas mineromedicinais de Ourense (Chavasqueira, O Tinteiro). Pouco antes de chegar ao espazo termal de Muíño da Veiga, na zona de Quintela, esta ruta conecta co desvío oeste cara a Canedo.

Camiño de Santiago – Itinerario ecuestre

Para os peregrinos que realizan a súa ruta dacabalo, ligámosvos a proposta de itinerario ecuestre da páxina oficial do Xacobeo. Se desexades entrar na cidade cos vosos animais, recomendámosvos avisar con antelación á Policía Local (Tel. 988 388138)

Camiño de Santiago – Servizos

Mapa con servizos de interese para o peregrino ao seu paso por Ourense.