Consellos para o baño

Horarios e tarifas

Os espazos termais de uso lúdico do río Miño (A Chavasqueira, Muíño de Veiga e Outariz/Burga de Canedo) abren todos os días de 10:00 a 20:00 horas. A entrada é gratuíta, cunha estancia máxima de 90 minutos. Pódense consultar as normas detalladas de uso nesta ligazón.

Por outra banda, as Termas de Outariz teñen unha tarifa xeral de 6’40 € (existen descontos para nenos e pensionistas), que permite unha estadía de 2 horas. Máis información sobre as normas de uso nesta ligazón.

Todas as instalacións teñen un aforo limitado e non se pode reservar o acceso con antelación.

Chegar ás termas

Os espazos termais xunto ao Miño teñen un acceso exclusivamente peonil. Se queres ir en coche, existen zonas de aparcadoiro habilitadas nas proximidades. Outra opción é montar no Tren das Termas, con saída da Praza Maior e parada nas inmediacións de todas as termas. Podes consultar información detallada sobre cómo chegar en coche, así como todas as opcións de aparcadoiro e transporte público neste enlace.

Antes do baño

• Equípate con bañador, chanclas e toalla, xa que é necesario acudir a estas instalacións con roupa axeitada.
• En todas existen vestiarios e consignas a disposición dos bañistas para gardar as pertenzas comodamente. Se queres usar as consignas nas termas gratuitas terás que levar o teu propio cadeado.
• Consulta o teu médico antes de acudir ás instalacións. Ten en conta que, tanto por composición mineral como pola súa elevada temperatura (entre 30º e 42º C), as augas termais de Ourense son un recurso medicinal.
• Respecta os tempos da dixestión antes do baño e evita a exposición prolongada ao sol.
• Lembra sempre tomar unha ducha antes do baño para preparar a túa pel: así absorberá mellor os minerais da auga e as súas propiedades.

Nenos nas termas

Nas termas gratuítas, non está permitido o acceso a menores de 10 anos.

Nas Termas de Outariz (de pago) poden acceder os nenos a partir de 5 anos. Os nenos de 5 a 8 anos terán que acreditar a idade (DNI, libro de familia…) e se miden menos de 1’50 metros non poderán acceder á zona do Spa Celta.

Cos nenos é necesario extremar as precaucións, polo que o baño termal non debería superar os 10-15 minutos de duración.

Espazos de relax e benestar

As instalacións termais de Ourense son espazos de baño deseñados para a relaxación, polo que existen unha serie de normas de convivencia que é importante coñecer e respectar.

• Non se admiten mascotas. Se te atopas nas beiras do río Miño, o teu can gozará moito máis nas zonas verdes.
• Deixa de lado o teu teléfono móbil, aparello de música, cámara de fotos, etc.
• Mantén un ton de conversación moderado: non molestarás aos demais usuarios e gozarás máis do baño.
• Son termas, non piscinas: non están pensadas para nadar nin mergullarse, tampouco para facer augadiñas ou salpicar.
• Modera os tempos de baño: non deberían superar os 30 minutos. Tenta facer pausas e, se es valente, contrastes con auga fría.

Despois do baño

Descansa sempre despois do baño e hidrátate bebendo líquidos. Aínda que non o pareza, as altas temperatura da auga aceleran o metabolismo e cansan o corpo.

Ao abandonar a instalación, lembra recoller todas as túas pertenzas e non deixar desperdicios.