A Chavasqueira
Campo da Feira S/N, 32001
De 10h a 20h
Conxunto de piscinas naturais ao aire libre no comezo do Paseo Termal do Miño. Trátase da zona de baño máis próxima ao centro urbano.
ACTUALIDADE 16/10/2024: Por mor da crecida do río Miño, esta instalación está temporalmente pechada. Consulta outras opcións termais na cidade de Ourense nesta ligazón
Se vimos do centro da cidade de Ourense, A Chavasqueira é o primero espazo termal que atoparemos no Paseo Termal do río Miño, só uns poucos metros logo da espectacular Ponte do Milenio.
Trátase dun conxunto de pequenas piscinas ao aire libre construídas en pedra e rodeadas pola vexetación de ribeira do Miño. Os vasos para o baño, nos que a auga rolda os 40° de temperatura, atópanse nunha gran zona axardinada nas marxes do Miño, un lugar perfecto para descansar e tomar o sol.
As augas que xurden neste espazo son hipertermais (temperatura do manancial 63,6ºC), de mineralización media, fluoradas con ións predominantes de bicarbonato e sodio, moi brandas e cun pH de 7.82
O espazo conta con vestiarios, aseos e consignas á disposición das persoas usuarias, así coma unha fonte de auga potable. O acceso é gratuito, aínda que existe un límite de capacidade, e para utilizar estas termas é preciso bañador, chancletas e toalla. No caso de querer utilizar as consignas hai que levar un cadeado. Non está permitido o acceso a menores de 10 anos.
A Chavasqueira é das zonas termais máis facilmente accesibles, pois conta con parada de bus urbano e aparcadoiro gratuíto nas inmediacións. O Tren das Termas tamén ten parada neste espazo.
Un espazo termal con moita tradición
A Chavasqueira nútrese dun manancial termal mineromedicinal coñecido desde moi antiguo en Ourense, e que lle valeu a zona o nome de «Caldas do Bispo». O título fai referencia ao Cardeal Quevedo, quen no século XIX ordenou acondicionalas para maior comodidade dos enfermos que acudían ao lugar buscando a cura termal.
O propio bispo mesmo adecuou un espazo para o seu goce privado, un fornelo de pedra que se pode ver no interior das veciñas Termas da Chavasqueira. O conxunto está ademais intimamente ligado ao xa desaparecido balneario das Caldas.
Xunto a beira do río, xa na auga, asómase a escultura dunha serea, obra do escultor Acisclo Manzano. Dependendo do caudal ás veces pode verse enteira ou so asomando cabeza e cola no río.
Contraindicacións:
Grave estado xeral da persoa usuaria – Embarazo – Convalecencia tras enfermidades graves, traumatismos importantes, postoperatorios, tras un ciclo de quimioterapia ou radioterapia. – Hipertensión, hipotensión e/ou afeccións cardíacas en grado moderado ou severo – Insuficiencia venosa en grado moderado o severo – Feridas abertas ou recentes, sen protección impermeable.
Espazo termal de uso exclusivamente lúdico. Prohíbese expresamente a prestación de servizos terapeúticos.
En todo caso, recoméndase contar con consello médico antes de empregar as instalacións
Horario
De 10h a 20h
Transportes
Zona peonil
Aparcadoiro gratuíto: Campo da Feira
Autobús L26 | Tren das Termas (L19)
Acceso gratuito
Acceso non permitido a menores de 10 anos
Declaración de auga termal e mineromedicinal: Resolución do 29 de maio de 2006 (DOG nº110, 8-06-2007)
A arteria verde da cidade concentra numerosos espazos termais onde descansar e desconectar da rutina.
Descubre cómo chegar aos espazos termais da cidade de Ourense en transporte público ou en coche. Se prefires usar o coche, lembra que o Paseo Termal é unha zona peonil e deberás dirixirte aos estacionamentos habilitados.
