Igrexa das Caldas

Igrexa situada no barrio da Ponte, na beira norte do río Miño. De claro estilo neogótico, no seu exterior, con atrio, destacan os esveltos arcobotantes, que contrarrestan a altura e o escaso grosor dos seus muros. O seu deseño é obra do arquitecto José M.ª Basterra e data do ano 1925.

O interior, de tres naves, cunha central e dous laterais sen cruceiro, conta cun fermoso retablo dourado labrado en madeira, obra do escultor Magariños. O retablo está presidido polo apóstolo Santiago, patrón do barrio e cuxa festa se celebra o 25 de xullo.

O barrio da Ponte non sempre pertenceu a Ourense senón que foi, até os anos setenta, o concello de Canedo. Ten as súas orixes no asentamento romano das Caldas, en referencia aos mananciais termais desta beira do río, e xa a comezos da Idade Media constitúese como parroquia. A súa historia está unida á do ferrocarril, que chega en 1881. En 1885 constrúese a primeira estación de tren, e ao seu redor edificios e almacéns, configurándose as primeiras rúas. En 1952 inaugúrase a actual estación Ourense-Empalme e con ela o barrio experimenta un forte desenvolvemento e unha reordenación urbana.