Museo Circo de los Muchachos

A finais da década dos 50 fúndase en Ourense, moi preto de Seixalbo, a “Ciudad de los Muchachos”: proxecto educativo, espazo de autoxestión xuvenil, utopía… Unha iniciativa do padre Jesús Silva Méndez (máis coñecido como Padre Silva) para mozos de distintas procedencias que axitou o Ourense dos anos 60 e que culminaría coa creación da primeira escola de circo de España, cuxa fama traspasou fronteiras.

O proxecto inicial ocupou varios espacios en Ourense, e asentaríase no anos 60 coa adquisición da finca de Benposta, moi preto da pintoresca poboación de Seixalbo.  Aquí foi tomando forma unha «cidade» xestionada de forma directa por nenos que chegou a ter concello (con eleccións democráticas), un banco que emitía a súa propia moeda, supermercado, gasolineira e escolas. A creación do circo catapultounos á fama; unha (entón pioneira) performance sen animais que viaxou por Europa, Asia e América, actuando en escenarios coma o Grand Palais de París ou o Madison Square Garden en Nova York.

O Museo Circo de los Muchachos, promovido pola Asociación Cultural Padre Silva (creada á morte deste en 2011) pretende recuperar a memoria deste “espazo socio-educativo de integración e formación” hoxe desaparecido. Tras uns anos situado na zona histórica de Ourense, este museo trasladouse ao recinto onde se atopaba a última escola, Benposta, moi preto á carpa do circo, a capela e a outras instalacións que constituían a Cidade dos Muchachos.

Carteis, panfletos e fotografías, recortes de prensa, audiovisuais e mesmo traxes e outros obxectos integran esta curiosa colección que busca perpetuar o recordo dun proxecto singular que levou o nome de Ourense por todo o globo.